Umhverfismál eru gæðamál!

01-03-2007

Gæði og umhverfi ganga svo sannarlega hönd í hönd hjá Sólarræstingu. Sólarræsting ehf. er þjónustufyrirtæki sem býður fyrirtækjum, stofnunum og sveitarfélögum upp á þjónustu við reglulegar ræstingar og ýmis hreingerningaverkefni. Alta hefur unnið með Sólarræstingu síðan í haust við að byggja upp gæða- og umhverfisstjórnunarkerfi í starfseminni í samræmi við viðmiðunarreglur umhverfismerkisins Svansins. Umsókn um Svansleyfi hefur nú verið skilað inn til Umhverfisstofnunar sem er að yfirfara öll gögn. Það er forvitnilegt að skoða þau áhrif og þann árangur sem gæða- og umhverfisstarfið hefur nú þegar kallað fram, fyrir utan ánægju starfsfólksins með starfið. Hér eru nokkur atriði:

• Fækkun ræstingarefna úr tólf í fjögur umhverfismerkt efni án þess að gæði ræstinga sé fórnað nema síður sé.
• Minnkuð notkun glærra plastpoka um 70%, úr u.þ.b. þremur tonnum í eitt tonn.
• Tilkoma þjálfunarmyndbands fyrir nýliða tryggir einsleitni og einföldun grunnþjálfunar, auk þess sem það er hagræðandi fyrir þjónustustjóra.
• Öflugra eftirlitskerfi tryggir aukið öryggi og veldur því að auðveldara er að grípa fyrr inn í þar sem eitthvað má betur fara.
• Tilkoma Sögubókarinnar, hugbúnaðar þar sem öll samskipti og eftirlit við sérhvern viðskiptavin eru skráð daglega. Sögubókin er, eins og nafnið ber með sér, kjölfestan í samskiptum Sólarræstingar við viðskiptavini fyrirtækisins, þ.e. hún geymir sögu þessara aðila.

Metnaðarfullt skólastarf og samvinna

27-02-2007

Áhersla á metnaðarfullt skólastarf og víðtæk samvinna í skólamálum, töldu þátttakendur sem sóttu skólaþing Rangárþings ytra og Ásahrepps laugardaginn 3. mars sl., vera farsælustu skrefin sem hægt væri að stíga núna til að eiga áfram góða skóla til framtíðar. Nær 90 manns tóku þátt í þinginu og eru þá meðtaldir nemendur á öllum aldri, sem áttu sinn þátt í að skapa góðan anda á þinginu. 80% þátttakenda voru úr Rangárþingi ytra og 20% frá Ásahreppi. Þingið var haldið að frumkvæði fræðslunefndar og stýrt af Alta. Þátttakendur kölluðu eftir mótun heildstæðrar skólastefnu þar sem m.a. væri mörkuð stefna um sjálfstæði skólanna, húsnæðismál og faglegan metnað. Skilaboð þátttakenda frá Áshreppi voru þau að standa beri vörð um skólastarf á Laugalandi. Þeir telja að samvinna milli skólastiga annars vegar og milli heimila og skóla hins vegar sé mikilvægur þáttur í góðu fræðslustarfi og menntun barnanna eigi alltaf að hafa forgang. Þátttakendum frá Rangárþingi ytra var efst í huga þörf fyrir endurbætur á húsnæði Grunnskólans á Hellu og kallað var eftir framtíðarlausn varðandi húsnæði leikskólans. Samvinna var þar einnig ofarlega á blaði, bæði innan skólasamfélagsins á Hellu og milli Hellu og Laugalands. Nokkuð skiptar skoðanir voru um sjálfstæði skólanna. Almennt voru skilaboð þingsins þau að sameining skólanna á Hellu og Laugalandi væri ekki tímabær og að bjóða ætti nemendum upp á val um skóla. Þó komu fram þau sjónarmið að sameiginleg yfirstjórn gæti skapað tækifæri til að samnýta kennara og fjölga valgreinum. Þá voru viðraðar hugmyndir um að nýta skólahúsnæði í Þykkvabæ með einhverjum hætti. Þinggestir töldu að tímabært sé að koma á fót framhaldsskóla fyrir sýsluna – og jafnvel stærra svæði. Gera má betur í því að kynna það sem vel er gert í skólamálum í sveitarfélögunum, að mati þeirra sem sóttu skólaþingið. Einnig vildu þeir að samræða um skólamálin haldi áfram og að skólastefna verði mótuð með aðkomu sveitarstjórna og fræðslunefndar, fagfólks innan skólanna, íbúa, nemenda og atvinnulífs.

Vistvæn innkaup á hraðsiglingu

16-02-2007

Sífellt fleiri Evrópuþjóðir vinna skipulega að vistvænum opinberum innkaupum og margar þeirra hafa sett sér aðgerðaráætlanir á landsvísu á þessu sviði (sjá nánar á http://ec.europa.eu/environment/gpp ). Í Evrópu eru opinber innkaup talin nema um 16% af vergri þjóðarframleiðslu. Innkaupaafl opinberra aðila er því mikið. Vistvæn innkaup er eitt besta tækið sem opinberir aðilar geta notað til auka framboð á vistvænum vörum á markaðnum og um leið draga verulega úr umhverfisáhrifum opinberrar starfsemi. Auk þess hafa vistvæn innkaup leitt til aukinn gæða og minni kostnaðar þar litið er til alls líftímakostnaðar vörunnar. Á Íslandi er nú unnið því að auka vistvæn opinber innkaup í samstarfi lykilstofnana á þessu sviði. Alta vinnur með stýrihópi verkefnisins sem hefur það að markmiði að auka þekkingu á þessu sviði og auðvelda opinberum aðilum að kaupa inn með vistvænni hætti.

Kraftmikið íbúaþing í Bolungarvík

12-02-2007

Á íbúaþinginu í Bolungarvík sem haldið var laugardaginn 10. febrúar var þeim 130 íbúum sem þar mættu, efst í huga að virkja auðlindir sínar, þ.e. fallega náttúru, fólkið og keppnisskapið - en án stóriðju. Fjölmargar hugmyndir voru viðraðar, allt frá jarðbundnum hugmyndum um hvar mætti leggja göngustíga til villtari drauma um Vestfjarðahraðlest og geimstöð á Bolafjalli. Unga fólkið sem mætti vel til þings, telur kostina við að búa í Bolungarvík felast í því að allir þekkja alla, umhverfið er friðsælt, fólk treystir hvert öðru og getur labbað allar vegalengdir. Þau vörpuðu fram ýmsum hugmyndum, eins og þeirri að í framtíðinni mætti byggja eitthvað í Bolungarvík sem allir myndu vilja koma að sjá, eins og Eiffel turninn í París, hafa ævintýraferðir og miðbær og góð íþróttaaðstaða var þeim ofarlega í huga. Smelltu hér til að sækja greinargerð um þingið og úrvinnslu Alta.

Íbúaþing í Fjarðabyggð í janúar

16-01-2007

Alta stýrði í janúar íbúaþingum í Fjarðabyggð, en þau eru liður undirbúningi fyrir mótun aðalskipulags Fjarðabyggðar, sem Alta hefur umsjón með. Nú eru tímamót í nýju sameinuðu sveitarfélagi og óskar bæjarstjórn eftir samstarfi við íbúa við mótun framtíðarsýnar fyrir Fjarðabyggð. Afrakstur íbúaþinganna er nýttur með tvennum hætti. Annars vegar munu skilaboð frá íbúum móta þá valkosti sem teknir verða til skoðunar í aðalskipulagi Fjarðabyggðar. Hins vegar verða skilaboð íbúa um brýn verkefni á hverjum stað tekin til skoðunar hjá bæjarstjórn og metin í tengslum við gerð fjárhagsáætlunar. Margvíslegt og mikilvægt efni safnaðist á íbúaþingunum en þau voru haldin á Norðfirði, Stöðvarfirði, Fáskrúðsfirði, Mjóafirði, Reyðarfirði og Eskifirði, 16. til 24. janúar s.l. Smelltu hér til að sjá samantekt um helstu skilaboð þinganna.