Stefnumótun ferðaþjónustu í Grundarfirði

Alta vinnur nú með Grundarfjarðarbæ að stefnumótun í ferðaþjónustu. Af því tilefni var haldinn opinn samráðsfundur með hagsmunaaðilum og áhugafólki um ferðaþjónustu í bæjarfélaginu þann 10. mars sl. í sal Fjölbrautaskóla Snæfellinga. Markmið fundarins nú var að leiða fram hlutverk Grundfirðinga í ferðaþjónustu og framtíðarsýn á ferðaþjónustu og hlut samfélagsins í henni. Greind voru sóknarfæri fyrir hönd ferðaþjónustunnar sem atvinnugreinar, stillt upp leiðum til að gera framtíðarsýnina að veruleika og reynt að forgangsraða aðgerðum. Góð stemmning var á fundinum og hugur í fólki að efla ferðaþjónustuna enda styðja ferðaþjónusta og uppbygging samfélagsins hvort annað. Líflegar umræður spunnust á fundinum og bættist ríkulega í hugmyndasarpinn. Alta mun vinna úr efni fundarins og verða niðurstöður kynntar síðar. Gert er ráð fyrir að stefnumótunarvinnunni ljúki í apríl. Í febrúar var haldinn sambærilegur fundur með hagsmunaaðilum og áhugafólki um ferðaþjónustu staðarins til að greina stöðu ferðaþjónustunnar. 

Upp