Nýr starfsmaður: Herborg Árnadóttir

Herborg Árnadóttir tók nýlega til starfa hjá Alta. Verkefni hennar snúast um skipulagshönnun og skipulagsgerð, samband borgarumhverfis og lýðheilsu, not á almenningsrýmum, mat á gönguhæfi umhverfis, vinnu með landupplýsingar, grafíska vinnu og þrívídd, umbrot og myndbandagerð.

Herborg hefur B.A. gráðu í arkitektúr frá Listaháskóla Íslands og M.S. gráðu í landfræði frá Háskóla Íslands. Lokaverkefni Herborgar fjallaði um samband lýðheilsu og skipulags en þar rannsakaði hún sérstaklega tengsl borgarumhverfis og hversdagslegrar hreyfingar hjá ungu fólki í Reykjavík. Hún hefur einnig unnið við fjölbreyttar rannsóknir á borgarrýmum með rannsóknarhópnum Borghildi, en hún var einn af stofnendum hans (sjá www.borghildur.info).

Nýjar loftmyndir frá Borgarnesi

Nú hefur 175 loftmyndum frá Borgarnesi verið bætt í loftmyndasafn Alta. Rétt er að minna á að nýlega voru heimiluð gjaldfrjáls not af öllum myndunum í safninu, líka í viðskiptatilgangi, með því eina skilyrði að vísað væri til Alta sem eiganda. Myndirnar á loftmyndavefnum eru í takmarkaðri upplausn en fá má betri gæði með því að senda beiðni á This email address is being protected from spambots. You need JavaScript enabled to view it.. Nánar hér: http://loftmyndir.alta.is.

Hvað kemstu langt hjólandi eða gangandi?

Í tilefni þes að Landspítalinn er nú að virkja starfsmenn sína til að nota vistvænni samgöngumáta og bjóða þeim samgöngusamning þá útbjó Alta fyrir allar starfsstöðvar spítalans svokölluð korterskort. 

Kortin eru bráðsniðug og byggja á rannsókn sem Reykjavíkurborg gerði á því hversu langt maður kemst gangandi eða hjólandi á 15 mínútum. Það kemur á óvart að það er nokkuð drjúgt. Kortin eru nú aðgengileg starfsmönnum spítalans.

Gjaldfrjáls not af loftmyndum Alta

Í loftmyndasafni Alta eru nú 3234 myndir, teknar víðsvegar um landið en flestar þó á höfuðborgarsvæðinu. Myndirnar eru allar hnitsettar og aðgengilegar á vefsjá. Ákveðið hefur verið að gefa frjáls afnot af myndunum án endurgjalds en með því vill Alta leggja sitt af mörkum í sífellt vaxandi púkk opinna og gjaldfrjálsra upplýsinga. Stuðst er við hið alþjóðlega Creative Commons fyrirkomulag á afnotaleyfum. Um er að ræða "BY" skilmála sem þýðir að öllum er heimilt að nota loftmyndirnar án þess að fá til þess sérstakt leyfi. Þó er sett það skilyrði að uppruni myndarinnar komi skýrt fram með því að hún sé merkt "Alta ehf" og vísað á vef fyrirtækisins, www.alta.is. Ef vatnsmerkið á myndinni sést greinilega er skilyrðið sjálfkrafa uppfyllt.

Myndirnar á vefnum, sem hver sem er getur sótt, eru í takmarkaðri upplaust (800 px lárétt) og með vatnsmerki en hægt er að fá myndir í meiri upplausn og án vatnsmerkis með því að senda beiðni í tölvupósti til This email address is being protected from spambots. You need JavaScript enabled to view it..">This email address is being protected from spambots. You need JavaScript enabled to view it.. Fyrir það er heldur ekki tekið gjald og sömu skilmálar gilda en myndirnar eru afgreiddar handvirkt og sendar við fyrstu hentugleika. Okkur þykir gaman að fá að vita til hvers myndirnar verða notaðar.

Smelltu hér til að opna loftmyndasafnið.

Svæðisgarður á Snæfellsnesi - Auðlind til sóknar

Heimamenn á Snæfellsnesi undirrituðu föstudaginn 4. apríl sáttmála um stofnun svæðisgarðsins Snæfellsness. Hann er samstarfsvettvangur, byggður á langtímasýn og vilja til varanlegs samstarf um þróun byggðar á forsendum nærtækra gæða og svæðisbundinnar sérstöðu. Markmiðið er að auka fjölbreytni í atvinnulífi og auka lífsgæði þeirra sem þar búa og starfa.

Þetta er hreinræktað frumkvöðlaverkefni Snæfellinga en í anda þróunar erlendis þar sem markviss svæðisbundin samvinna er nýtt til að efla innviði. Svæðisgarðurinn er verkfæri til að ýta undir jákvæða þróun og búsetu - eins konar byggðaþróunarmódel. Við hjá Alta höfum verið þeirrar ánægju aðnjótandi að vinna að stofnun svæðisgarðsins með Snæfellingum á síðustu misserum. Svæðisskipulag er nýtt sem verkfæri til að móta stefnuna sem samvinnan byggir á. Þannig verður svæðisskipulagið sem sveitarfélögin fimm ákváðu að vinna í raun “sóknaráætlun” Snæfellsness.

Komið er á víðtæku samstarfi og leitað leiða til að auka og miðla þekkingu um Snæfellsnes, gæði þess og hagnýtingu gæðanna - til framfara. Með góðum og aðgengilegum upplýsingum um sérstöðu og auðlindir heimabyggðarinnar og leiðbeiningum um hvernig megi nýta þær frekar, er stutt við atvinnulíf og stofnanir samfélagsins. Leitað verður tækifæra til að búa til aukin verðmæti úr nærtækum gæðum hvort sem litið er til matvælavinnslu, iðnaðar, listsköpunar eða skólastarfs og rannsókna. Verðmætasköpun er lykilorð.

Sérstakur vefur lýsir svæðisgarðinum, sjá hér. Stutt myndband frá stofnfundinum má sjá hér.

Upp