"Ég held að það sem vanti hjá okkur, að það er margt sem við erum að gera, margt gott, en það er ekkert alltaf sýnilegt"

"Forgangsraða fjármunum til verkefna sem snúa beint að fjölskyldunni"

"Klára verkefni sem byrjað hefur verið á í bænum"

"Aðstaða til íþrótta, leikja og útivistar verði til fyrirmyndar svo eftir verði tekið."

"Gera sundlaugina eftirsóknarverðari fyrir barnafólk"

"Göngustígaskipulagið er gott en það þarf að klára"

"Fyrsta verkefnið: "Kjarnaskóg" undir Hamarinn"

"Vantar fleiri fótbolta og körfuboltavelli útí hverfin"

"Hér er ekkert línuskauta- og hjólabrettasvæði. Á þannig svæði væri hægt að stunda street-hokký"

"Frá krökkunum: Það er ekki nóg að láta krakkana hanna velli og leiksvæði, það þarf líka að byggja þau"

"Skólalóðin er algjörlega óviðunandi eins og hún er í dag. Það er einlæg ósk okkar að unnið verði hratt og vel að því skipulagi sem fyrir liggur í dag um bætta skólalóð"

"Lækka umferðarhraðann, búa til vistgötur og einstefnur"

"Ullarþvottastöðin er sóknarfæri"

"Nýta ónýtt gróðurhús sem athafnahús fyrir unga sem aldna bæjarbúa"

"Maður getur labbað allt og það er ekki mikil umferð í Hveragerði"

"Nemendur fá verkefni við sitt hæfi og samskipti við kennara og starfsfólk eru í fínu lagi"

  Niðurstöður um einstök svæði og viðfangsefni

Ásýnd og ímynd

Á þinginu kom fram að íbúum finnst ásýnd bæjarins ábótavant í ýmsum atriðum, s.s. frágangi í iðnaðarhverfi, á opnum svæðum, götum og göngustígum og ónýt gróðurhús eru til lýta. Íbúar skynja að fréttir af fíkniefnamálum og pólitískum ágreiningi virðast hafa skaðað ímynd bæjarins út á við. Hvergerðingar eru meðvitaðir um að það er í þeirra valdi að breyta þessu og er fullur hugur í bænum til að taka á þessum málum með samstilltu átaki íbúa, félagasamtaka, fyrirtækja og bæjaryfirvalda.

Forgangsröðun verkefna

Talsvert hefur borið á því að uppbyggingu ýmissa umhverfisverkefna og frágangi þeirra hafi ekki verið lokið til fulls og eru það skilaboð íbúaþingsins að ganga þurfi harðar fram í því að forgangsraða verkefnum, bæði þeim sem fyrir liggja og öðrum nýjum sem eru á döfinni. Þetta á reyndar bæði við um umhverfisverkefni og önnur verkefni bæjarins.

Íþróttaaðstaða

Fram kom að bæta þurfi íþróttaaðstöðu til muna. Íþróttahúsið er orðið of lítið fyrir almenna notkun. Óskað var eftir fjölgun á körfu- og boltavöllum á leiksvæðum, eins og hverfis- og grenndarvöllum og að komið verði upp malarvelli fyrir fótbolta. Sundlaugin nýtur greinilega mikilla vinsælda bæði meðal heimamanna og gesta, en þó voru flestir á þeirri skoðun að bæta þurfi þar leikaðstöðu fyrir börn, þó svo að þá þurfi að fórna því rólega andrúmslofti sem laugin býður uppá.

Göngu- og reiðstígar

Fyrir liggur umhverfisskipulag Hveragerðis þar sem gert er ráð fyrir göngu- og reiðstígakerfi. Almennt kom fram ánægja með skipulag göngustíga, en bent var á að það þurfi að ganga betur frá þeim og tengja göngustígana í byggðinni við grænu svæðin og/eða útivistarsvæðin í bænum og við útjaðarinn, þ.m.t. útivistarsvæðið undir Hamrinum. Einnig komu fram ábendingar um að merkingar þurfi að bæta.
Reiðstígum þarf að fjölga að mati þátttakenda, m.a. til að koma í veg fyrir að göngustígar séu notaðir sem reiðstígar. Nauðsynlegt sé að eiga samstarf við hagsmunaaðila og Ölfus í þessu máli.

Sú hugmynd kom einnig fram að nota Varmána meira sem útivistarsvæði. Meðfram ánni væri hægt að koma upp gönguleið sem bæði bæjarbúar og gestir gætu notið.

Útivistaraðstaða - Hamarinn

Fyrir dyrum stendur að halda áfram að bæta útivistaraðstöðu á svæðinu sunnan undir Hamrinum, en þar er nú þegar fjölnota grasvöllur og kominn göngustígur yfir og við Hamarinn, sem að hluta er í skóglendi. Þátttakendur á íbúaþinginu fögnuðu þessu framtaki og lögðu gríðarlega áherslu á að þeirri uppbyggingu verði haldið áfram af krafti. Líkur eru á að ullarþvottastöð sem stendur í grennd við svæðið, verði lögð af á þeim stað og sjá íbúar það sem sóknarfæri sem ætti að tengja útivistarsvæðinu. Þátttakendur sáu fyrir sér að þarna geti orðið "Kjarnaskógur" Hvergerðinga, sem jafnframt muni laða að sér gesti víðar að.

Leik- og útivistarsvæði

Ýmsar ábendingar komu um útivistar- og leiksvæðin í Hveragerði, önnur en undir Hamrinum. Börnin sögðu meðal annars að skólalóðin sé í raun aðal leiksvæðið. Fram kom að það vanti fleiri minni sparkvelli inni í íbúðahverfum. Helstu hugmyndir og ábendingar er að finna á kortinu.

Skólalóð

Unnið er að endurhönnun skólalóðar og er sú vinna í höndum fyrirtækisins Landslags. Þátttakendur gátu kynnt sér þau drög sem nú liggja fyrir og komið athugasemdum og hugmyndum á framfæri við starfsmann Landslags.
Talað var um að gróður ætti að vera í lágmarki, enda nýtist nálægðin við Lystigarðinn. Nefnt var að gæta þurfi að ferlimálum fatlaðra.

Umferð

Ýmsar ábendingar komu fram um umferð í Hveragerði, sem sjá má hér. Varðandi lokun á Skólamörk kom fram sú hugmynd að það yrði eingöngu gert á álagstíma, t.d. með því að strengja keðju yfir götuna.

Áformaðar eru breytingar á Breiðumörk, til að draga úr umferð og gera götuna aðlaðandi og koma þær til framkvæmda á þessu ári. Á íbúaþinginu var hægt að koma með ábendingar og athugasemdir við þá hönnun sem nú liggur fyrir. Helst komu athugasemdir um staðsetningu trjáa, að tré á miðri götunni byrgi útsýni fyrir stærri bíla og nefndur sá möguleiki að hafa tré til hliðanna og þrengja götuna.

Staðsetning blaða- og fernugáma

Kallað var eftir hugmyndum um staðsetningu blaða- og fernugáma. Sjá mynd.

Menningar- og félagsmiðstöð

Áhugi Hvergerðinga á að komið verði upp einhvers konar menningar- og félagsmiðstöð kom greinilega fram á íbúaþinginu. Margvísleg starfsemi var þar nefnd til sögunnar, s.s. íþróttaaðstaða og aðstaða fyrir félagsstarf, námskeið og tómstundir. Nefndar voru hugmyndir á borð við handverkshús, kaffihús og blóma- og grænmetismarkað. Miðstöðin ætti að höfða til allra aldurshópa, en lögð var sérstök áhersla á aldurshópinn 16 - 20 ára. Það húsnæði sem helst var nefnt fyrir slíka starfsemi var ullarþvottastöðin, gamla hótelið og aflögð gróðurhús.

Starf íþrótta- og æskulýðsfulltrúa

Frá 1. ágúst n.k. verður komið á fót nýju starfi íþrótta- og æskulýðsfulltrúa og var það eitt af markmiðum þingsins að kalla eftir hugmyndum um þau verkefni sem hann ætti að sinna. Þátttakendur töldu nauðsynlegt að mótuð verði stefna um starfið og verkefna- og kostnaðaráætlun í framhaldi af því. Meðal verkefna verði að samræma bæði félagsstarf barna og það forvarnastarf sem þegar er unnið í bænum. Leggja þurfi áherslu á að koma upp samastað fyrir unglinga og bæta íþróttaaðstöðuna, en jafnframt að auka tómstundamöguleika þeirra sem ekki finna sig í íþróttastarfi. Talið var mikilvægt að stefna að því að auka samveru kynslóða og að efla enn frekar samstarf við nágrannasveitarfélögin á sviði íþrótta- og æskulýðsmála.

Hugmyndir barna og unglinga

Fyrir þingið var unnið með 5. bekkjum Grunnskólans og 9. bekk og fleiri nemendum á unglingastigi og kynntu fulltrúar þeirra niðurstöður sínar á þinginu. Fram kom ánægja með skólann eins og reyndar líka hjá hinum fullorðnu. Yngri börnin lýstu því yfir að það er gott að búa í Hveragerði, vegna þess hvað bærinn er rólegur og hægt að labba allt sem þau þurfa að fara. Þau eru ánægð með sundlaugina en bentu á að það mætti setja þar rennibraut. Þau nefndu það sérstaklega að "fólkið er skemmtilegt út af því að við þekkjumst svo vel".
Eldri krakkarnir eru að sama skapi ánægð með litla umferð og stuttar vegalengdir og fagna því að búið er að opna félagsmiðstöðina eftir langt hlé. Þau kvarta undan því að íþróttahúsið er alltof lítið og eiga sér óskir um gervigrasvöll og litla körfu- og fótboltavelli og síðast en ekki síst um línuskauta- og hjólabrettasvæði. Þau tóku sérstaklega fram að umhverfið og náttúran í Hveragerði er mjög falleg og að í bænum eru margar náttúrulífsperlur. Þau hugsuðu líka út fyrir bæinn sinn og tjáðu draum sinn um frið á jörð.