"Verðlaun fyrir að mæta á íbúaþing verða að koma fljótt. Ekki bara vöfflur með rjóma, það þarf að vera meira sýnilegt."

"Góð lausn á ýmsu sem aflaga fer eða vanda þarf betur er t.d. samráð og samvinna íbúa, t.d. með sjálfboðavinnu"

"Þeir sem mæta ekki á fundi, þeir geta ekki verið að böggast, þeir mættu ekki. Þeir þurfa að taka ábyrgð á sínu samfélagi"

  Samráð

Bæjarstjórn Hveragerðis vill leggja aukna áherslu á samráð við íbúa við stefnumótun og forgangsröðun verkefna í bæjarfélaginu og markaði íbúaþingið veigamikið skref í þá átt. Þátttakendur fögnuðu þessu og töldu að það myndi styrkja Hveragerði, bæði inn á við og út á við. Fram komu ýmsar hugmyndir um leiðir til að bæta upplýsingastreymi frá bæjarstjórn til íbúa og um formlegan samráðsvettvang.

Ímynd

Á íbúaþinginu var lögð áhersla á að byggja upp jákvæða ímynd af Hveragerði. Þar er fyrst og fremst vísað til landsfjölmiðla, en almennt var talið að jákvæð umfjöllun þar gæti jafnframt skilað jákvæðum árangri inn á við, meðal íbúanna sjálfra. Helst var nefnt að bærinn gæti staðið fyrir reglulegum blaðamannafundum og gerði sem mest af því að senda fréttir frá bænum, með sérstaka áherslu á jákvæð málefni.
Upplýsingastreymi frá bæjarstjórn til íbúa
Það sem þátttakendur töldu helst koma til greina til að bæta og auka upplýsingastreymi frá bæjarstjórn, var að nýta heimasíðuna enn betur og að útvarpa bæjarstjórnarfundum.

Formlegar samráðsleiðir

Ein af helstu niðurstöðum hópsins sem fjallaði um samráð og næstu skref, var að það myndi styrkja samskipti íbúa og bæjaryfirvalda ef haldinn væri sameiginlegur stefnumótunarfundur, með fulltrúum bæjaryfirvalda, stofnana ríkisins í bænum, félagasamtaka og fyrirtækja. Slíkur fundur ætti jafnframt að vera opinn öllum íbúum. Heppileg tímasetning væri fyrir gerð fjárhagsáætlunar, þannig að hann gæti verið efniviður við forgangsröðun verkefna.

Bent var á að þjónustusamningar sem sveitarfélagið áformar að gera við félagasamtök, bjóði upp á tækifæri til að virkja félögin í ýmis jákvæð verkefni fyrir samfélagið og að sjálfsagt væri að nýta það.

Einnig mætti efna til samráðsfunda um tiltekin málefni, með viðkomandi hagsmunaaðilum og opinna funda með íbúum, þar sem mál væru tekin fyrir almennt.
Þá var nefndur sá möguleiki að láta gera kannanir meðal íbúanna, um einstök málefni, eða koma upp aðgengilegum hugmyndabanka.
Niðurstaðan var að um þetta þurfi að móta stefnu og taka upp ákveðnar verklagsreglur.

Samskipti meðal íbúa

Íbúar gerðu ekki aðeins kröfur til bæjarstjórnar, heldur bentu jafnframt á að þeir sjálfir gætu gert betur í að auka samheldni, m.a. með óformlegum samkomum og uppákomum af ýmsu tagi. Meðal annars kom fram sú hugmynd að haldinn verði sérstakur kynningardagur fyrir nýja íbúa í bænum, þar sem félagasamtök og aðrir kynni starfsemi sína. Lagt var til að kannað verði hvort grundvöllur og áhugi sé meðal Hvergerðinga, fyrir stofnun íbúasamtaka.