Alta - Skipulag umhverfi stefnumótun verkefnastjórn

Útboð Reykjavíkurborgar á vistvænum ræstingum hafa hlotið alþjóðlega athygli sem gott dæmi um hvernig opinberir aðilar geta stuðlað að aukinni sjálfbærni og um leið náð fram umtalsverðum sparnaði. Reykjavíkurborg skrifaði nýlega samantekt ("case study") um útboðin og árangur þeirra með aðstoð Alta. Samantektin var skrifuð að beiðni ICLEI sem gott dæmi um innleiðingu vistvænna innkaupa hjá sveitarfélagi og verður hún birt í gögnum sem kynnt verða á alþjóðlegu ráðstefnunni Ríó +20 á næsta ári.

Í tveimur ræstingarútboðum á vegum Reykjavíkurborgar árið 2009 voru sett skýr umhverfisskilyrði m.a. um efnanotkun og gefin stig ef þjónustan var umhverfisvottuð. Útboðin byggðu á ítarlegri þarfagreiningu í samráði við notendur.

Árangur útboðanna var eftirfarandi:

• Kostnaður vegna ræstinganna minnkaði um 50%, þ.e. um 90 milljónir á ári.
• Efnanotkun minnkaði um 65% í öðru útboðinu og 33% í hinu.
• Meira en 95% af efnum í ræstingunum eru umhverfisvottuð.
• Plastpokanotkun í skrifstofuhúsnæði minnkaði um 200 kg ári.
• Heilsusamlegra vinnuumhverfi.
• Aukin ánægja hjá starfsfólki Reykjavíkurborgar með gæði ræstinganna.
• Mikil fjölgun Svansvottana á Íslandi. Markaðshlutdeild Svansvottaðrar ræstingarþjónustu jókst úr <10% árið 2009 í >50% árið 2011.
• Stóraukið framboð af vistvænum ræstingarefnum og -vörum hjá söluaðilum á Íslandi.

Þessi árangur Reykjavíkurborgar er svo sannarlega hvatning fyrir opinbera aðila að stunda vistvæn innkaup, meðal annars með útboðum sem byggja á góðri þarfagreiningu og skýrum umhverfisskilyrðum (sjá www.vinn.is). Innkaupamáttur opinberra aðila er mikill og með þessum hætti geta þeir stuðlað að betra umhverfi, sparnaði og eflingu græns hagkerfis á Íslandi.

Myndin sýnir fjölda Svansvottana á Íslandi á árunum 2000 - sept. 2011, bæði heildarfjölda og fjölda vottana fyrir ræstingarþjónustur.