Alta ráðgjafarfyrirtæki

Svandís Svavarsdóttir umhverfisráðherra staðfesti Aðalskipulag Fljótsdalshéraðs þann 21. desember 2009 en vinna við skipulagið hófst vorið 2007. Þetta er fyrsta aðalskipulag sveitarfélagsins eftir að það varð til við sameiningu Austur-Héraðs, Fellahrepps og Norður-Héraðs, árið 2004. Aðalskipulagið er byggt á góðri samvinnu við íbúa, því þar er mótuð stefna fyrir samfélag þeirra, byggð á sérstöðu og auðlindum sveitarfélagsins. Grunnur að samvinnu við íbúa var lagður á Héraðsþingi 2005 en þar var framtíð sveitarfélagsins rædd.

Skipaður var sérstakur stýrihópur til að annast mótun skipulagsins og sátu í honum Árni Kristinsson, formaður, Baldur Pálsson, Magnús Jónasson, Eyþór Elíasson og Gylfi Hallbjörnsson, ásamt þremur fulltrúum úr bæjarráði, Jónínu Rós Guðmundsdóttur, Guðmundi Ólafssyni og Birni Ármanni Ólafssyni. Fundi stýrihóps sátu einnig Eiríkur Bj. Björgvinsson, bæjarstjóri, Ómar Þröstur Björgólfsson, skipulags- og byggingarfulltrúi og Skarphéðinn Smári Þórhallsson, héraðsfulltrúi. Ákveðið var að móta atvinnustefnu og skilgreina fjórðu stoðina í stefnu Fljótsdalshéraðs, þ.e. staðardagskrá 21, jafnframt vinnu við aðalskipulagið. Stefna Fljótadalshérðas ásamt þessum nýju stefnuþáttum reyndust mikilvægur grunnur fyrir aðalskipulagið.

Samvinna við íbúa var með ýmsum hætti, aðallega á fundum víðsvegar um sveitarfélagið þar sem aflað var hugmynda og sjónarmiða og tillögur kynntar. Þá var aflað upplýsinga um framtíðaráform landeigenda með sérstakri könnun, dreifibréf sent og haldið málþing um sérstöðu og framtíðarþróun í sveitarfélaginu. Allt myndaði þetta góðan efnivið í skipulagið.

Eins og gefur að skilja voru ólík sjónarmið um ýmsa þætti skipulagsins, t.d. um þróun byggðar og legu vega. Nýja skipulagið felur í sér töluverða breytingu frá því gamla, t.d. með áherslu á ný byggingarsvæði norðan núverandi byggðar á Egilsstöðum, lengingu flugbrautar, nýju brúarstæði og vegi um Melshorn. Meðal áhersluatriða má nefna verndun landbúnaðarlands. Í október 2008 var haldin sýning á þeim drögum sem þá lágu fyrir og bárust allmargar gagnlegar ábendingar frá íbúum og hagsmunaaðilum. Tillagan var síðan samþykkt til auglýsingar í nóvember 2008. Aftur bárust ábendingar og athugasemdir sem fjallað var um vorið 2009 og skipulagstillagan síðan samþykkt þann 24. júní 2009.

Á myndinn eru, frá vinstri: Árni Geirsson, Svandís Svavarsdóttir, Eiríkur Björn Björgvinsson, Soffía Lárusdóttir og Salvör Jónsdóttir