Rammaskipulag í Urriðaholti - verðlaunaskipulag

Rammaskipulag fyrir Urriðaholt í Garðabæ hefur fengið verðlaun frá Boston Society of Architects (BSA). Verðlaunin eru veitt fyrir framúrskarandi skipulag, sem unnið hefur verið frá grunni með sjálfbæra þróun og virðingu fyrir umhverfi og samfélagi að leiðarljósi. Byggðin er lágreist og nokkuð þétt, með áherslu á að skapa þau gæði sem við fólk skynjar í rótgróinni byggð. Verðlaunin tengjast einnig góðu gönguumhverfi, meðferð ofanvatns til að vernda Urriðavatn, tengingum við útivist og síðast en ekki síst því hvernig leitast er við að mynda skjól og fanga sólarljós. Með þessu rammaskipulagi hefur verið sleginn nýr tónn í skipulagi byggðar á Íslandi. BSA er stærsta fagfélagið innan amerísku arkitekta- og skipulagsfræðinga samtakanna, með yfir 4.000 félaga. Auk arkitekta og skipulagsfræðinga eru í félaginu verkfræðingar, þróunaraðilar, verktakar, starfsfólk sveitarfélaga ofl. Tilgangur verðlaunanna er að vekja athygli á framúrskarandi hönnun og skipulagsáætlunum. Dómnefnd tekur mið af fjölmörgum þáttum sem varða t.d. hagræna og samfélagslega þætti, auk hönnunar, sem beint og óbeint hafa áhrif á gæði byggðarinnar. Það er arkitektastofan Arrowsteet sem hannaði viðskiptastrætið í rammaskipulaginu, sem er félagi í BSA og tilnefndi rammaskipulagið í Urriðaholti til þessara verðlauna.

Upp