Blágrænar ofanvatnslausnir
Leiðir náttúrunnar nýttar við meðferð vatns innan byggðar
Alta hefur verið leiðandi í innleiðingu blágrænna ofanvatnslausna (e. SUDS – Sustainable Drainage Systems) hérlendis. Þær eru umhverfisvænni leið til að meðhöndla vatn innan byggðar og við leiðbeinum við mótun, skipulag og útfærslu þeirra.
Hröð þróun
Blágrænar ofanvatnslausnir ryðja sér nú hratt til rúms í nágrannalöndum okkar sem sjálfbærari og hagkvæmari lausn við meðferð ofanvatns. Innleiðing þeirra er einnig lykilatriði sem viðbragð við loftslagsbreytingum, bæði til að auka getu byggðar til að takast á við meiri öfgar í veðurfari og jafnframt til að minnka umhverfisáhrif hennar.
Reynslan sýnir að blágrænar ofanvatnslausnir auka viðnámsþrótt hins byggða umhverfis gegn aukinni úrkomu, bæta umhverfisgæði og geta haft minni kostnað í för með sér en hefðbundnar regnvatnslagnir.
Frumkvöðlastarf á Íslandi
Við hjá Alta höfum verið í fararbroddi við innleiðingu þessara lausna hér á landi. Alta kom m.a. að skipulagi Urriðholts í Garðabæ, sem er fyrsta hverfið á Íslandi þar sem blágrænum ofanvatnslausnum er beitt í heild sinni.
Alta hefur útbúið leiðbeiningabækling um blágrænar ofanvatnslausnir sem einkum er ætlaður íbúum og sveitarstjórnarfólki sem vill kynna sér kosti þeirra. Auk þess unnum við vef og leiðbeiningar um blágrænar ofanvatnslausnir með Reykjavíkurborg og Veitum.
