Aðalskipulag
Alta hefur langa reynslu af gerð aðalskipulags með sveitarfélögum
Við leggjum áherslu á að skipulagið nýtist sem stjórntæki fyrir hagkvæma og vistvæna þróun umhverfis, atvinnu og byggðar. Sérstaða Alta liggur meðal annars í góðri yfirsýn og þekkingu ráðgjafa, vönduðu samráði og virkri miðlun gagna til íbúa, atvinnulífs og kjörinna fulltrúa, til dæmis með vefsjám.
Öll aðalskipulög sem Alta hefur unnið síðustu ár eru stafræn aðalskipulög í opnum hugbúnaði.
Framtíðarsýn sveitarfélags
Aðalskipulagsáætlanir eru mikilvæg stefnumótun til að raungera framtíðarsýn hvers sveitarfélags fyrir sig. Mikilvægt er að stefnan endurspegli vel tækifæri og áskoranir á hverjum stað, sé gerð í góðu samstarfi við kjörna fulltrúa og íbúa og að ferlið sé gegnsætt og lýðræðislegt.
Stafrænt skipulag
Alta hefur verið leiðandi í vinnslu stafrænna aðalskipulaga sem þýðir að gögnin sem verða til í skipulagsgerðinni eru lifandi og gagnvirk. Uppdráttur aðalskipulagsins nýtist þannig einnig sem gagnagrunnur fyrir sveitarfélagið í margvíslegu samhengi. Í dag er það skylda sveitarfélaga að skila aðalskipulögum með stafrænum hætti samkvæmt skipulagslögum.
Við vinnslu aðalskipulags birtum við stafræn gögn þess í vefsjá sem eykur gegnsæi og bætir aðgengi almennings að skipulagsgerðinni. Íbúar geta þannig hæglega kynnt sér aðalskipulagið á vinnslustigi og haft áhrif á mótun þess með skilvirkari hætti en áður. Sjá hér dæmi um vefsjá sem við gerðum fyrir Vestmannaeyjabæ við vinnslu aðalskipulags.
Rammahluti aðalskipulags
Með rammahluta aðalskipulags er unnin nánari stefna fyrir ákveðin skilgreind svæði eða þemu sem miklu máli skipta fyrir sveitarfélagið. Dæmi um það er nánari stefna fyrir gæði byggðar og bæjarýma í miðbæ tiltekins sveitarfélags, útivistarsvæði og græn svæði, eða rammi um sjálfbæra meðhöndlun ofanvatns með blágrænum ofanvatnslausnum. Sjá nánar einnig umfjöllun um rammaskipulag.
Góð verkefnastjórn
Aðalskipulagsáætlanir krefjast ekki síst góðrar verkefnastjórnunar með skýrri tímalínu og skilningi á mikilvægi ferlisins sjálfs.