Rammaskipulag
Stefna fyrir hverfi, bæjarhluta eða tiltekinn málaflokk
Oft er of langt bil á milli heildarsýnarinnar sem aðalskipulag gefur og þeirrar afmörkuðu myndar sem birtist í deiliskipulagi. Rammaskipulag brúar þetta bil og getur til dæmis sett fram sýn fyrir heilt hverfi og hvernig það virkar, innbyrðis og sem hluti af borg eða bæ.
Yfirsýn
Með rammaskipulagi fæst yfirsýn yfir mikilvæg þróunarsvæði með skýrri stefnu sem gefur tóninn fyrir þróun svæðisins. Þannig er hægt að horfa á heilt hverfi og skilgreina hvernig það geti virkað sem best sem heild, þvert á samliggjandi deiliskipulagssvæði.
Rammaskipulagsvinnan felur í sér greiningu á sérstöðu hvers svæðis, áskorunum og tækifærum. Mótuð eru leiðarljós og markmið til framtíðar og jafnframt lagðar meginlínur, svo sem um helstu tengingar, samsetningu húsnæðis, hlutverk almenningsrýma og yfirbragð byggðar. Rammaskipulagsstigið getur þannig einnig verið mikilvægt tæki fyrir sveitarfélög og þróunaraðila til að móta sameiginlega sýn.
Ólíkar útfærslur
Stundum er rammaskipulag sett fram einungis sem leiðbeinandi áætlun sem síðan er útfærð nánar í deiliskipulagi. Einnig er hægt að festa stefnuna að hluta til eða heilu lagi í aðalskipulagi sveitarfélaga, sem kallast þá rammahluti aðalskipulags og fær þannig meira lagalegt vægi.
Oft eru rammaskipulög gerð fyrir þróun nýrra hverfa eins og gert var í Urriðholti í Garðabæ. Einnig getur rammaskipulag fjallað um þegar byggt hverfi eða bæjarhluta eins og Kársnes í Kópavogi, og Akademíureit og Ásbrú í Reykjanesbæ. Í þeim tilvikum er samráð við íbúa lykilþáttur í vinnunni.
Rammaskipulag getur líka verið vettvangur greiningar og stefnumótunar fyrir afmörkuð viðfangsefni, til dæmis sem rammi fyrir blágrænar ofanvatnslausnir eins og unnið er að fyrir Grundarfjörð.
Einnig getur það fjallað um tiltekinn málaflokk,t.d. ferðaþjónustu, sem gæti þá náð til samspils áfangastaða, ferðaleiða, þjónustu og náttúruverndar. Rammaskipulagið getur verið sjálfstæð stefnumörkun samstarfsaðila úr ólíkum áttum, án beinnar tengingar við ákvæði skipulagslaga. Það getur líka birst sem rammahluti aðalskipulags, eða hvort tveggja.
